Skip to main content

कथा कसरी लेख्ने

-भवसागर घिमिरे

कथा सुन्न सुनाउन त रमाइलो हुन्छ नी हैन ? कथा बुन्न पनि निक्कै रमाइलो हुन्छ ।

Picture: Room to Read
यहाँहरूलाई थाहा भैसकेको पनि होला, कथा भनेको हाम्रो दैनिकमा भएका, देखेका, भोगेका, सुनेका घटनाहरू पनि हुन । जुन काल्पिनिक पनि हुनसक्छ । सत्य घटना पनि हुन सक्छ । त्यसमा विभिन्न पात्रहरू हुन्छन् । जनावर, मानिस, रुख, ढुंगा सजिव निर्जिव सो सुकै पनि पात्र हुनसक्छन् । राम्रो कथामा उतारचढाव हुन्छ र यसले हामी सबैको मन छुन्छ ।

आजको भागमा भने मैले कथा कसरी लेख्न सकिन्छ भन्ने कुरा सुनाउन गैरहेको छु । सुनिसकेपछि यसलाई तपाईहरूले पनि घरमा अभ्यास गर्न नभुल्नु होला है । 

सुरु गरौं कथा कसरी तयार पार्ने ?


कथा खोज्न टाढा जानु पर्दैन । पहिला हामी आफ्नै घर भित्रै हेरौं । पहिला विभिन्न घटनाहरूलाई एक ठाउँमा राखौं ।

गोठमा भैसी कराइरहेको छ ।

बाबा टौवामा पराल थुत्दै हुनुहुन्छ ।

भाइले केरा खायो र बोक्रा आँगनमा फाल्यो ।

आमाले पानी लिएर आउनु भयो ।

म पिढीँमा बसेर पाठ पढ्दैछु ।

आमा केराको बोक्रामा चिप्लेर लड्नु भयो ।

पानी सबै पोखियो ।


तपाईहरूको उमेर समुहका लागि एकैपटक ठूलो कथा सोच्नु भन्दा यस्तै साना साना घटनाहरू जोड्दै जाँदा कथा लेख्ने उपाय पनि आउँछ र मीठो पनि हुन्छ । अब अघि भनेका घटनाहरूबाट कसरी कथा बनाउने त ? त्यसको सुरु कहाँ बाट गर्ने र अन्त्य कहाँबाट गर्ने ? के थप्ने के हटाउने ? अब त्यता तिर सोचौं है ?


घटनाहरू यसरी लेखिसकेपछि हामीले त्यसलाई मालामा फूलहरू जोडेजस्तै गरि जोड्न सक्छौं । माला अझ राम्रो बनाउन अरु फूलहरू पनि ल्याउन सक्छौं । भनेको अरु घटनाहरू पनि थप्न सक्छौं । तर यसरी घटना जोड्दा हामीले हाम्रो पाठकहरूको ध्यान तान्ने, मन तान्ने गरि जोड्नु पर्छ । जस्तो कि, अब के होला ? अब के होला भन्ने कौतुहलता ल्याउन सक्नु पर्छ । सँगसँगै कथा पढ्दा त्यसको दृश्यहरू पनि पाठकको दिमागमा बस्ने बनाउनु पर्छ । तब न कथा राम्रो हुन्छ । हाम्रो कथामा पनि सुरुवातमा केही यस्तो कुरा होस् कि त्यसले हाम्रो पाठकको ध्यान तानोस् । त्यसैले अब यी घटनालाई कसरी जोड्दा मज्जाको बन्ला भनेर हेरौं है ?


माथि हामीसँग धेरै घटनाहरू छन् । कौतुहलता जगाउन लेखक पिच्छे आफ्नै तरिकाहरू हुन्छन् । मेरो बीचारमा भने,


भाइले केरा खायो र बोक्रा आँगनमा फाल्यो । भन्ने वाक्यले हामीलाई कथा सुरु गर्न अझ सघाउँछ । यसले अब के होला भन्ने प्रश्न पनि ल्याउँछ । अझ यो बोक्रामा आमा लड्दै हुनुहुन्छ । अब भाइले आमालाई धेरै माया गथ्र्यो भन्ने भयो भने त भाइलाई झनै दुखी बनाउँछ अनि उसले पछि यसो गर्दैन । त्यसैले अझ यसरी सुरु गर्न सकिन्छ ।


भाइलाई आमाले असाध्यै माया गर्नु हुन्थ्यो । शनिबार मामा घरमा जाँदा आमाले उसलाई मन पर्ने मुग्रे केरा ल्याइदिनु भयो । भकारीमा राखेको केरा आज मस्तले पाकेछ । भाइ कपाकप केरा खाँदै आँगनमा खेल्दै थियो । म पिढीँमा बसेर पढ्दै थिएँ । बा टौवाबाट पराल थुत्दै हुनुहुन्थ्यो । बाले पराल थुतेको देखेर गोठको काली भैसी ‘वाइ वाइ’ गरेर कराउन थाल्यो । धारोमा पानी नआएकाले उसले कुँडो पनि खान पाएको थिएन । आमा भर्खरै पानी लिन जानु भएको थियो ।


यहाँ मैले केही कुराहरूथपेँ...यसले पढ्ने मान्छेको दिमागमा चित्र कोर्न सघाउँछ । 


बडा बडा ३ वटा मुग्रे केरा भाइ एक्लैले सक्यो । बोक्रा भने फ्वात्त आँगनमा फाल्यो अनि फेरि खेल्न थाल्यो । त्यसै बेलामा आमा पानीको गाग्रो बोकेर आउनु भयो । पानी ल्याएको देखेर काली भैसी खुब खुसी भयो । अचानक आमाकोे चप्पल केराको बोक्रामा प¥यो र आमा चिप्लेर लड्नु भयो । पानीको गाग्रो आँगनबाट गल्ट्याङ गुल्टुङ गुडुल्कीँदै तल्लो बारीमा खस्यो । पानी पुरै पोखियो । म र भाई दकुर्दै आमालाई समाउन गयौं । बाबा पनि हत्तनपत्त आउनु भयो । आफ्नो कारणले आमा लड्नु भएपछि भाइ ङ्वाँ ङ्वाँ रुन थाल्यो । आमाले भाइलाई च्याप्प काखमा लिनु भयो र फुलाउनु भयो । भाइले त्यसपछि कहिल्यै आँगनमा फोहोर फालेन ।


भाइबहिनीहरू तपाइले याद गर्नु भो ? अघिका घटनाहरूमा केही कुरा थपेर हामीले जोड्यौं । यसरी घटनाहरूमा हामीले थप केही घटनाहरू बुनेर थप्न सक्छौं जसले हाम्रो कथालाई अझै मनछुने बनाउँछ । यसमा भैसीले पानी खान पाएन । आमा फेरी पानी लिन जानु प¥यो । आमाले माया गरेर भाइलाई ल्याइदिनु भएको केराकै बोक्रामा लड्नु भयो । र भाइले आफै पाठ सिक्यो । यसरी कथाले सन्देश पनि बोक्छ र मन छुने पनि हुन सक्छ । कथा पढ्दा यो कथाको दृश्य तपाइँको दिमागमा पनि बस्छ, हैन ? कि बसेन ?


त्यसैले कथा बुन्दा पहिला विभिन्न घटनाहरू लेख्ने । त्यसलाई बुन्दै जाने । केही थप्ने केही फाल्ने । कुन घटनापछि कुन घटना राख्दा पढ्दा मज्जा आउँछ आफैले बिचार गर्ने र शिक्षक, अभिभावकलाई सोध्ने पनि गर्न सकिन्छ । 



घरमा कस्ता कथा वस्तु हुन्छन ?


घरमा भाई जन्मेपछि दाईलाई के भो ? कसरी सबैले भाइलाई माया गर्न थालेपछि सुरुमा उसलाई भाइ मन परेन । पछि कसरी भाइ उसको मिल्ने साथी भयो ? कथा एक दिनको, एक छिनको वा वषौंसम्मको पनि हुनसक्छ । 


विज्ञानका कथाः   खाल्डो हालेको पातपतिङ्गर कसरी मल बन्यो ।

गोबरको गुइँठा कसरी बन्यो भात पाक्यो ?

कुन रुखको के काम । (रुख गन र नाम भन, प्रकृती बुझ्ने)

मैले ढिँडो पकाउन कसरी सिकेँ ? 



घरको कथालाई कसरी उतार्ने ?


पहिला पात्रहरू लेख्ने ।

विभिन्न घटनाहरू लेख्ने ।

त्यसलाई शिलशिला वद्ध बनाउने ।

कौतुहलता जगाउने हिसाबले घटनाक्रम मिलाउने ।

स्थानीय भाषा, दृश्यहरू मिलाएर घटनाहरू वर्णन गर्ने । थोरै हाँसो, थोरै खुशी, थोरै दुःख, थोरै माया सबै कुरा मिसाएर कथा मीठो बनाउन सकिन्छ ।


यसमा अभिभावकले कसरी सघाउन सक्छन् ? अब के गर्ने ?


कथा लेखिसकेपछि, अभिभावकले हेरिसकेपछि र सुनिसकेपछि । लागेको कुरा थपघट गर्ने । 

अरुलाई सुनाउन कस्तो लाग्यो भन्ने ।

सबै भन्दा ठूलो सबै बालबालिका प्रोत्साहित गर्नु पर्छ । 


भाइबहिनीहरू आजको कुरा तपाइहरूलाई केही फाइदाजनक भयो होला भन्ने आश गरेको छु । घरमा आफैले कथा बुन्ने अभ्यास गर्नुहोस् । साथीभाई, शिक्षक, अभिभावक अग्रज सबैको सल्लाह लिनुहोस् । तपाईहरू पक्कै भोली ठूलो लेखक बन्न सक्नुहुनेछ ।













Comments

Popular posts from this blog

एउटा खाली पाना

  एउटा खाली पाना जसमा कोरिन सक्थ्योे करौडा तालीका कविता एउटा खाली पाना जसमा बन्न सक्थ्योे अरबौं बिम्बका चित्र जबरजस्ती आगोमा फालियो एउटा खाली पाना जसले काँधमा थाप्न सक्थ्यो यो देशको भविष्य भर्खरै खरानी भयो एउटा खाली पाना एउटी निर्मला एउटी पुष्पा एउटी माया तपाई कै छोरी, दिदी,  बहिनी, चेली उहि, एउटा खाली पाना ।

मोबाइलको साटो पुस्तक

बाल मनोविज्ञानमा आधारित भएर लेख्नु आफैमा जटिल र चुनौती पुर्ण छ  । त्यसैमाथि सबै भन्दा सरल बनाउँनु पर्ने विषय पनि यहि रहेछ । बाल मस्तिस्कको सोचाइको धरातल फराकिलो बनाउँने  प्रयास म सधैं जारी नै राख्नेछु । बालबालिकाहरुलाइ आज राम्रा पुस्तक पढ्न दिँदा भोलीका दिनमा उनीहरुले रचनात्मक काम गर्न सक्छन् । हामी सबैले पढ्ने र पढाउँने बातावरण बनाउँन मद्दत गरौं । मेरा यी रचनाहरुमा चित्र कोरेर सुन्दर बनाइदिने नागरिक दैनिकका Dewen दाई र Yuwak जी, भाषामा सघाउने Shekhar दाई अनि प्रकाशनमा ल्याउँने Sangrila Book का Mani जीलाई धेरै धेरै धन्यवाद । म अछाम नपुगेको भए सायद यो बालकथा अाउँदैन्थ्यो होला । सन् २००९ मा Room to Read Nepal को कथा कार्यशालामा नअटाएको भए सायद 'हाम्रा खेलहरु' का बारेमा उबेला बाल कविता फुर्दैन्थ्यो । सधै‌ झै, छोराछोरीको हातमा मोबाइलको साटो पुस्तक दिउँ । उनीहरुका आँखा र दिमाग झनै तेजिलो हुनेछन् । अघिल्ला तीन कृती... माथिका तीन पुस्तकहरु ' पाठीलाई स्वेटर, भान्छामा चुट्किला, देउता खुशी हुनुभयो' तलका पुस्तक पसलहरुमा यस अघि नै आइसकेका छन् । नयाँ पुस्तक...

जाडोका चिसा उखान टुक्का

बिस्तारै बिस्तारै बढ्दै गरेको जाडोले विहान धेरै अबेर सम्म पनि हामीलाई बिस्तारामा सिरक भित्रै रोक्न सक्छ । झ्यालका पर्दा घामले नखोली कन हामी आफै खोल्न तम्सन पनि गाह्रो हुन्छ । विहानै तातो चियाको गिलासलाई ओठले चुम्न पाउँदा मात्र हात गोडा चलमलाउन थाल्छन् । अझ एका विहानै काममा जानु पर्ने वा कलेज जानु पर्नेलाई त जाडो कहिल्यै नआए हुन्थ्यो झै हुन्छ । यस्तो कठ्याङ्ग्रीने जाडोको बेलामा हाम्रा उखान टुक्काहरू कसरी बांगिने गर्छन्, यसबारेमा केही प्रसंग तल छ । तपाइलाई यो जाडो मौसम भरि न्यानो घामले माया गरोस शुभकामना ! जाडोले कामेको गोरुलाई बोरा ओढाउन सकिन्छ, सिरक ओडाउन सकिन्न अनिकालमा बिउ जोगाउनु, चिसोमा जिउ जोगाउनु चिसोले समाएको मान्छेलाई, आइसक्रिमले पनि लखेट्छ अर्काको आंङमा गन्जी लगाएको देख्ने, आफ्नो आंङमा जकेट लगाएको  नदेख्ने ? हिटरले पोलेको मान्छे, राइस कुक्कर देख्दा तर्सन्छ  थर्मस फुटे, तातो लुटे खाइ न पाइ, लेदर जकेट लाई  काम पाइनस छोरो, मोजामा आइरन लगाइ