सम्झनामा जहाजका तस्बिर मात्र


हिजो जहाज दुर्घटनाको समाचार थाहा पाए पछि निक्कै खल्लो लाग्यो ।  नेपाल वायुसेवा निगमको ट्वीनअटर जहाज हो भन्ने थाहा पाए पछि मैले आफूसँग भएका यात्राका फोटोहरू पल्टाउन थाले । पछि थाहा पाएँ यो त्यही जहाज थियो जसले मलाई कुनै बेला नेपालगञ्जबाट जुम्ला र मुगुबाट नेपालगञ्ज सुरक्षित ल्याउन सघाएको थियो । 
 म २०६७ को वैशाख ११ गते यो जहाजमा नेपालगञ्जबाट जुम्ला उडेको थिएँ । बीबीसी मिडिया एक्सनको रेडियो कार्यक्रम उत्पादनको शिलशिलामा । जहाज उडेर जुम्ला ल्याण्ड नगरे सम्म पुगिन्छ भन्ने टुंगो हुँदैन्थ्यो । उडानहरू खराब मौसमका कारण बीच बाटोबाटै फर्केका पनि धेरै उदाहरणहरू थिए । त्यसैको केही महिना पछि (अषाढ १ गते ) सीता एरलाइन्सबाट नेपालगञ्ज देखि जुम्ला उडेका हाम्रो टोली बीचबाटो बाटै पुनः नेपालगञ्ज फर्केको थियो, खराब मौसमका कारणले । केही दिन कुरेर ४ गते उड्दा मात्र हामी सकुशल जुम्ला अवतरण गर्न सक्यौं । जहाजमा पहाड तीरको यात्रा गर्दाको अनुभव निक्कै रोमाञ्चक अनि डरलाग्दो थियो त्यती बेला ।

पहिलो पटक जुम्ला, कर्णाली जानु । पहिलो पटक नेपाल एरलाइन्सको जहाज चढ्नु मेरो लागि निक्कै नौंलो अनुभव थियो । जहाज त्यती बेला ४० वर्ष पुरानो थियो भन्ने कुरा ऐले आएर थाहा भयो । ऐले त ४३ वर्ष पुरानो भैसकेछ । तर नेपालगञ्ज, जुम्लामै पनि के सुनिन्थ्यो भने सबै भन्दा राम्रो नेपाल एरलाइन्स नै हो किनकी यसले रिक्स लिँदैन । पाइलटहरू निक्कै अनुभवी हुन्छन् । हातमा यसैको उड्ने टिकट पाउँदा निक्कै खुसी भएको थिएँ । तर मौसम अनि इञ्जिनको गडबडीका बीच पाइलटहरूको सिपले पनि हार खाँदो रहेछ । दुर्घटनाको खबरले मन दुखी छ । आफूसँग भएका यसका तस्बिर र जहाज उडानको बेलाको भिडियो हेर्दा मन कता कता दुख्दो रहेछ । उडान सुरक्षामा नेपाल निक्कै कमजोर भैसकेको छ । आखिर हामीले कहिले सम्म यस्तो समाचार सुनिरहनु पर्ने होला ?

यो जहाजसँगको केही सम्झना (साथमा अन्य तस्बिर)
Jumla Airport
Jumla Airport with Sita Airlines
Mugu Airport

Pilot of Nepal Airlines Flying to Jumla
Outside View from NA Plane




Pilot of Nepal Airlines Flying to Jumla



Comments