Monday, July 29, 2013

पर्यटन बिस्तारमा बन्दिपुर

बन्दिपुर घुम्न आउने पर्यटकको संख्या बढ्न थालेपछि होटल थपिने र बिस्तार हुने काम तिब्र बनेको छ ।
हालसालै होटल गाउँघरले सेवा बिस्तार गर्ने क्रममा भवनको तल्ला थपेको छ ।  नेवा छेँ ले स्वरूप नयाँ बनाएको छ । होटल चौतारी, मगर भिलेज एण्ड रिसोर्ट नयाँ थपिएका छन् । बन्दीपुर भिलेज रिसोर्ट, हिल हेभेन, पिया होटल, नेवाः खाजा घरले पनि कोठा बिस्तार गरेका छन् । गाविसकै मोहरीयामा पनि लजको लागि नयाँ भवन थपिदै छन् । गाउँकै पुरानो मध्येको एक बन्दिपुर माउन्टेन रिजोर्टले टुडीखेल छेउमा नयाँ भवन बनाउँदै छ । पर्यटन आगमनको मुख्य समय
आउँदो भदौं र असोजका लागि लक्षित गरेर सो भवन तयार गर्न लागिएको हो ।

‘२४ कोठाको भवन अबको लगभग तीन महिनामा रेडि हुँदैछ,’ माउन्टेन रिजोर्टका आवास प्रबन्धक वैश गुरूङ भन्छन्, ‘प्री बुकिङ पनि धमाधम भइरहेको छ ।’ उनका अनुसार गएको चैत र यो महिना होटलका ८० प्रतिशत कोठा भरिभराउ थिए । आउँदो सेप्टेम्बर अक्टुबरका लागि ५० प्रतिशत कोठा बुक भैसकेका छन् । कोठा नपुगेर ग्राहक धेरै पटक फर्काएको उनी बताउँछन् ।
‘कहिले काहीँ त आन्तरिक पर्यटकको फ्लो पनि यत्ति बढ्छकी धान्नै सकिँदैन,’ गुरूङ भन्छन्, ‘यही भएर नै होटल बिस्तार तिब्र बनेको हो ।’

गएको वर्षको तुलनामा यो वर्षको अप्रिलमा हवाईमार्गबाट आउने पर्यटकको संख्यामा १५.८ प्रतिशतले वृद्धि भएको छ । सरकारले २०११ लाई नेपाल पर्यटन वर्ष घोषणा गरिसकेको छ । पर्यटन वर्षमा दशलाख पर्यटक भित्राउने सरकारी लक्ष्य छ । लक्ष्य पुरा गर्न सरकारले काठमाडौं, पोखरा र चितवन जस्ता पर्यटकीय गन्तव्य स्थल बाहेकका अन्य क्षेत्रमा पनि पर्यटक पु¥याउने योजना गरेको छ ।

बन्दीपुरमा पनि विदेशी बाहेक पछिल्लो समयमा देशका विभिन्न भागबाट आमा समुह, युवा क्लब, क्याम्पस तथा स्कुलका शैक्षिक भ्रमणको ओइरो लागेको व्यवसायीहरू बताउँछन् । ठूला होटलले नधानेका ग्राहकलाई घरघरले पेइङ् गेष्टका रूपमा पनि स्वागत गर्ने गर्छन । विभिन्न गैर सरकारी संस्था, बैंक तथा मस्र्याङ्दी जल बिद्युत आयोजनाका वार्षिक कार्यक्रम तथा सेमिनारले पनि होटलहरू भरिने गरेको छ ।
यति हुँदा हुँदै पनि गाउँमा पर्यटक सूचना केन्द्र व्यवस्थित हुन नसकेकोमा धेरैको दुखेसो छ । ढुङ्गा तथा टिनले छाएका सुन्दर बस्तिका घरहरूले आज सम्म लालपुर्जा पाएका भने छैनन् । ‘हप्ताअघि पोखराबाट नापी टोली आएको छ’ प्रधान छात्रावासका कृष्ण कुमार प्रधान भन्छन, ‘नाप्ने काम भर्खर सुरूभएको छ ।’  उनका अनुसार गाउँमा होटल बनाउन जग्गा र घर खोज्न आउनेको चाप पनि निक्कै बढेको छ । केहीले जग्गा भाडा लिएरै भएपनि भवन बनाइरहेका छन् ।
त्यस्तै मध्येका एक हुन ताग्रीङ्ग गाविस लमजुङ्गका हितमान गुरूङ । बन्दिपुरको व्यापार फस्टाउन थालेपछि उनी मानाङमा रहेको होटल बेचेर यता पसेका हुन । उनले पन्ध्र वर्षका लागि जग्गा भाडामा लिएर टुँडिखेल नेर भर्खर नयाँ होटल बनाएका छन्, मगर भिलेज एण्ड कफि हाउस । बाह्रवर्ष मानाङमा होटल व्यवसायी गरेको अनुभव सँगालेका उनी यहाँपनि  राम्रो गर्न सकिनेमा आशावादी छन् । ‘भर्खर भवन बनाएर सकिएको छ, दशवटा रूममा फर्निसिङको काम बाँकी छ’ भाई काशीरामसँगै होटलको काममा व्यस्त हितमानले भने, ‘राजनीतिक वातावरण राम्रो भयो भने व्यवसाय छिट्टै फस्टाउथ्यो ।’
पर्यटकको चाप पहिला भन्दा केही बढेकोमा हिल वे क्या फे की सुनीता केसी पनि खुसी छिन् । धेरैले रोजगारी पनि पाएका छन् । गाउँको छिमेकी गावीस केशुटारकी बबिता सुुनुवारले पनि बन्दिपुर माउन्टेन रिसोर्टमा काम पाएकी छिन् । उनलाई देशमा भएको राजनीतिक द्वन्द्वले फेरि पर्यटनमा बाधा पुग्छ कि भन्ने डर पनि छ । ‘किन नहोस् त, देश बिग्रीयो भने पर्यटक घट्छन् , अनि हाम्रो जागिर फुत्कीहाल्छनी’ उनले हाँस्दै भनिन् ।
बन्दिपुरमा पर्यटक प्राय दुई दिन बस्नका लागि आउने व्यवसायीहरू बताएँछन् । विदेशी पर्यटकमा विशेष गरि युरोप र अमेरिकाका बढीमात्रामा गाउँ भित्रने गर्छन् । थामसेर कु, यति, काठमाडौं, भिस्ता, शंकर, हार्डरक, माइ नेपाल, आर एन टि, बेस क्याम्प आदि ट्राभल्स् बन्दिपुरमा पर्यटक ओसार्न सक्रिय रहेका वैश गुरूङ बताउँछन् । प्रतिरात तीन सय देखि ६ हजार सम्म पर्ने कोठाहरू यहाँ उपलब्ध छन् । तर, आन्तरिक पर्यटकका लागि भने केही सस्तोमा गाँस र बासको व्यवस्था यहाँका होटल तथा गाउँलेले गर्ने गरेका छन् ।
नेवार जातीको बाक्लो बस्ती रहेको बन्दीपुर बजार, मस्र्याङदी उपत्यका र हिमश्रृखला हेर्न मिल्ने टुँडिखेल, सूर्योदय नियाल्न सकिने थानीमाईको डाँडा, बाख्रा अनुसन्धान केन्द्र आदि स्थानले पर्यटकको मन खिच्न सक्छ । सुन्तला तथा रेशम खेती, सिद्ध गुफा, तीनधारा, रामकोटको पैदल यात्रा, सुनाखरी मार्ग, खड्गदेवी, बिन्दोवासिनी, महालक्ष्मीका मन्दिर आदि यहाँका सुन्दर गन्तव्य स्थल हुन । वर्षै भरि हुने चाड पर्वले यहाँको सुन्दरतामा रौनकता थपिदिएको छ ।
तनहुँ ३० वैशाख, Nagariknews 2010

No comments:

Post a Comment